KALIMAH PARÉNTAH (B. Sunda)

   

a.     Kalimah Panitah, kalimah nu digunakeun pikeun nitah jalma ngalakukeun pagawéan.

Contona:

·        Endul, launan atuh radiona!

·        Cing atuh Husni, ulah nangtung hareupeun panto!

·        Cik, eureunan ngaroko téh Bayu, euweuh manfaatna!

·        Punten Pa, ningal karcisna!

b.     Kalimah Pangajak, kalimah nu dipaké pikeun ngajak jalma séjén sangkan ngalakukeun pagawéan babarengan.

Contona:

·        Héri, hayu urang sakola bisi kebeurangan!

·        Rida, urang ulin ka Matahari Mall, yu!

·        Mangga atuh, sasarengan sareng abdi!

c.      Kalimah Pangharepan, kalimah nu eusina mangrupa harepan (kahayang).

Contona:

·        Mugi Néng Riska sing énggal damang!

·        Muga-muga harepan urang tinekanan!

·        Hayang téh gera liburan, rék ulin ka Inggris!

d.     Kalimah Panyaram, kalimah nu eusina nyaram ka batur sangkan teu ngalakukeun pagawéan nu teu dipiharep.

Contona:

·        Ulah ngalamun di lawang panto, Diah!

·        Teu meunang miceun runtah di dieu!

·        Entong badeur ari jadi budak téh, bisi bodo!

·        Ulah liwat kana pager cucuk, bisi tikait!

e.      Kalimah Pangwadi (anjuran), kalimah nu eusina mangrupa anjuran.

Contona:

·        Mun, ganti atuh baju téh, Nita!

·        Hadéna mah ulah waka réa omong!

·        Sawadina Cép Bayu lapor heula ka Pa RT!

f.       Kalimah Pangjurung, kalimah nu eusina mangrupa pangjurung ka jalma pikeun ngalakukeun pagawéan nu rék dipilampah.

Contona:

·        Geura indit ari rék sakola mah!

·        Gancang leumpangna bisi kabeurangan!

·        Burukeun mandina, Acep!

·        Énggal atuh upami bade ngiring mah!

g.     Kalimah Panggeuri (permohonan), kalimah nu eusina mangrupa pamenta.

Contona:

·        Emh, Euis hampura Dina!

·        Hih, atuh Ujang cing sabar wé!

·        Cing atuh, abdi pasihan, Gan!

·        Duh gusti, mugi masihan jalan ka Kang Dudi!